Hazrat Syed Mohammad Baba Tajuddin Auliya

 

Hazrat Syed Mohammad Baba Tajuddin Auliya

 

Alqaab

Taaj-ul-Auliya, Shahenshah e Hafta e Aqleem.

 

Aap ki wilaaadat 15 Rajab 1277 Hijri (27 January 1861 A.D.) ko Jumeraat ko Nagpur ke qareeb Kamthi me hui.

 

Aap ke waalid ka naam Sayyed Maulana Badr-ud-deen bin Sayyed Haidar Shaah aur waalida ka naam Sayyeda Maryam Bibi binte Shaikh Sayyed Meeran hai.

Aap Husaini saadaat hain.
Aur Hazrat Imaam Sayyed Hasan al-Askari rahmatullāhi alaihi ki nasl se hain aur Hazrat Khwaja Sayyed Baha-ud-deen Muhammad Naqshband rahmatullāhi alaihi ki nasl se hain.

Aap ke pardaada Makka mukarrama se Hindustan tashreef laaye the aur Chennai (Madras) me muqeem hue the.

 

1 saal ki umr me Aap ke waalid ka aur 9 saal ki umr me aap ki waalida ka inteqaal hua.
Is ke baad Aap ki naana aur maamu Abdul Rahmān ne Aap ki parwarish ki.

 

Aap ne Kamthi ke madrasa me ta’aleem haasil ki.

Ek martaba Aap ki mulaaqaat Hazrat Abdullāh Shaah Qaadri Nagpuri rahmatullāhi alaihi se hui. Unho ne Aap ko ek khushk mewa (dry fruit) diya aur farmaaya ke “Kam khaao, kam so, kam bolo, kaṡrat se tilaawate qur’an karo.” Us mewe ko khaate hi Aap par wajd taari hua.
Is ke baad Aap akṡar wajd me kho jaate.

 

18 saal ki umr me sailaab me Aap ke maamu ka makaan tabaah ho gaya. Is liye Aap apne maamu ke saath kaam ki talaash karne lage. 21 saal ki umr me 1298 Hijri (1881 A.D.) me Nagpur Army Regiment me shaamil hue.

Fauj ke saath Aap jab Sagar gaye to waha puri raat Hazrat Daawūd Chishti rahmatullāhi alaihi ki sohbat me guzaarne lage. Aakhir me Aap ne fauj se istifa de diya aur aalame mazdoobiyat me Sagar ki galiyo me ghumne lage.

Aap ki naani saahiba ko pata chala to wo Aap ko Kamthi le gai.
Aap gali me nikalte to bache Aap par patthar phenkte magar Aap is se be-parwaah hote.

 

Ek martaba ghumte ghumte Aap Nagpur chale gaye. Ek angrez aurat ne fariyaad ki to fauj ka afsar ne Aap ko giraftaar kar liya aur Magistrate ke hukm se Aap ko 2 Safar 1310 Hijri (26 August 1892 A.D.) ko paagal khaane me laaya gaya.
Dusre din ek sipaahi ne Aap ko Kamthi ki galiyo me ghumte hue dekha. Us ne ye baat afsar ko batai to woh foran ghode par sawaar hokar tezi se Nagpur gaya. Jab woh paagal khaane me pahuncha to us ne dekha ke Baaba ek darakht ke neeche jalwa farma hain aur muskura rahe hain. Us ne waha ke doctor se baat ki to doctor us ko us kothri ki taraf le gaya jaha Baaba ko salaakho ke pichhe band kiya gaya tha. Waha pahunchkar dekha to Baaba kothri ke andar hain aur muskura rahe hain. Afsar ko dekhkar Aap ne farmaaya “Tum apna kaam kar rahe ho aur main apna kaam.” Yeh sunkar woh afsar itna muta’aṡṡir hua ke woh har itwaar ko apne pariwaar ke saath Baaba ki ziyarat ke liye aane laga.

Ek martaba Aap lohe ke bartan me mitti bharkar use sar par rakhkar jaa rahe the. Paagal khaane ke afsaro ne dekha to hairat me pad gaye ke mitti se bhara hua bartan Aap ke sar se thoda ooncha hawa me Aap ke saath chal raha hai. Phir Paagal khaane ke doctoro ne Aap ko paagal khaane ke ahaate (compound) me logo se milne ki ijaazat di.

Is ke baad beshumaar log Aap se milne aane lage.
16 saal tak paagal khaane me qayaam ke dauraan Aap logo ko faiz ata farmaate rahe aur Aap ki dua se bahot saare logo ko beemaari se shifa aur tandurasti mili aur be-aulaado ko aulaad mili.

Ek martaba ek paagal paagal khaane se bhaag gaya. Dr. Abdul Majeed bahot fikr-mand hue. Aap ne faramaaya “Fikr mat karo. Woh jaldi waapas aa jaayega.”
Dusre din wo paagal waapas aa gaya. Jab us se waapas aane ki wajah puchhi gai to us ne bataaya ke “Jab main apne ghar pahuncha to Baaba Taaj-ud-deen waha mile aur mujhe 2 tamaache maare aur foran waapas jaane ke liye farmaaya. Is liye main waapas aaya.”
Yeh sunkar Dr. Abdul Majeed Aap ke mureed o moataqid ho gaye.

 

Nagpur ke Maharaja Raghoji Rao Bhonsle bhi Aap ke moataqid the. 6 Jamaadi uṡ ṡaani 1326 Hijri (9 July 1908 A.D.) ko subah ko 3 baje Aap Maharaja ke khwaab me tashreef laaye aur Laal Mahal ki taraf ishaara karke farmaaya ke “Ab main yaha rehna chaahta hu.” Maharaja ne foran Governor ko Aap ko riha karne ke liye darkhaast bheji. Aur 2000 rupye ki zamaanat par 24 Sha’abaan 1326 Hijri (21 September 1908 A.D.) ko Aap ko paagal khaane se Laal Mahal me laaya gaya.

Ek arse tak Laal Mahal me qayaam pazeer rehne ke baad Aap Nagpur ke qareeb Vaki me tashreef le gaye aur Kashinath Rao Patel ke makaan me muqeem hue. Yaha bhi log Aap se faiz haasil karne ke liye aane lage aur kuchh hi waqt me Vaki ‘Chhota Nagpur’ ke naam se mash’hoor ho gaya.

1339 Hijri (1920 A.D.) me Aap Nagpur Laal Mahal me waapas aaye.

 

Karaamat

(1) Ek martaba Aap Kanhan nadi ke kinaare ret me laite hue the. Shantabai aur Subhadrabai naam ki 2 aurten aap ki khidmat me hair hui. Dono ko koi aulaad nahi thi. Jaise hi dono Baaba ke qareeb pahunchi to Aap ne (un ke baghair bataaye) un ki dil ki khwaahish jaan li aur 2 laddoo nikaale aur dono laddoo me se thoda chakhkar dono ko ek ek laddoo diya aur dua ki. Shantabai ne apna laddoo khaa liya magar Subhadrabai ne laddoo nahi khaaya aur use ret ke niche rakh diya kyun ki woh Baaba ka jhuta tha.
Aap ki dua se Shantabai ko hamal raha aur 9 mahine baad beta paida hua. 2 mahine baad wo apne bete ko lekar aai aur Baaba k qadmo me rakha. Yeh dekhkar Subhadrabai rone lagi aur kehne lagi ke “Baaba! Mera bacha kaha hain?” Aap ne ret ki taraf ishaara kiya aur farmaaya ke “Use ret ke niche talaash karo.” Subhadrabai ko apni galti ka ehsaas hua. Us ne muafi maangi. Aap ko raham aaya aur dua ki to dusre saal ALLĀH ke fazl se Subhadrabai ko bhi beta paida hua.

(2) Ek martaba Aap baazar se guzar rahe the. Ek Sunaar ki dukaan par thehre aur farmaaya ke “Apne makaan ko khaali kar do.” Wo sunaar Aap se aqeedat rakhne waalo me se tha. Us ne Aap ke hukm ki taamil karte hue apne baal bacho ko lekar us makaan ko khaali kar diya. Jab raat hui to us makaan ko achaanak aag lag gai. Yeh dekhkar logo ko Hazrat ka farmaan ki wajah samajh me aai.

(3) Ek martaba Dr. Abdul Majeed ne ek jalse me shirkat ke liye Mumbai jaane ka iraada kiya aur Hazrat ki baargaah me haazir hokar ijaazat chaahi. Aap ne farmaaya ke “Mat jaao, Raasta tumhare liye khatarnaak hai.”
Jab Dr. saahab ne zyada israar kiya to Aap ne darakht ke patte tod kar diye aur farmaaya ke “Is ko saath lekar jaao.” Dr. Sahab Mumbai ke liye rawaana hue.
Raaste me kisi zaroorat ki wajah se Bhusaval Railway Station par utre.
Woh Railway line paar kar rahe the ke achaanak ek train ka engine un ke bilkul qareeb aa gaya aur ghabharahat me woh railway line par gir pade.
Haalaanki engine puri raftaar se aa raha tha lekin jaise hi un ke nazdeek aaya to rook gaya. Railway ke mulaazimeen ne un ko line se uthaaya aur kaha ke “Kya aap koi Aamil hain? Engine khud ba khud kaise rook gaya?” Yeh sunkar Dr. Saahab ne logo ko pura waaqya bataaya ke Kaise Baaba ne un ki hifaazat ki.

(4) Ek martaba ek shakhs ne Aap ki khidmat me haazir hokar arz kiya ke “Huzoor! Main Ajmer shareef jaana chaahta hu.” Aap ne farmaaya “Ajmer yahi hai, kaha jaata hai?” Yeh farma kar Aap ne apna mubarak haath us ke haath par rakh diya.
Us shakhs par yeh kaifiyat taari hui ke woh Ajmer ki sair kar raha hai. Kuchh der baad Hazrat ne us ke haath par se apna haath hataaya to unho ne khud ko Aap ki khidmat me maujood paaya.

(5) Ek marataba Naazim Riyaasate Jaipur Yusouf Ali Khan Aap ki baargaah me apne waalid ki sehat-yaabi ki dua ke liye haazir hue. Aap ne unhe dekhte hi un ke kandhe par padi hui shaal utaar li aur zameen par bichhaate hue farmaaya ke “Faatiha padho Hazrat, Faatiha.” Aur faatiha ke liye haath uthaaye. Yusouf Ali Khan ne aur deegar haazireen ne bhi Faatiha ke liye haath uthaaye.
Faatiha ke baad Yusouf Ali Khan Hakeem Zafar Jaipuri ke ghar pahunche to waha taar ke zariye khabar aa chuki thi ke un ke waalid ka intiqaal ho gaya hai.
Jaipur pahunch kar ma’aloom hua ke jis waqt Hazrat ne Nagpur me faatiha padhi thi usi waqt Jaipur me un ke waalid ki namaaz e janaaza padhi jaa rahi thi.

(6) Ek martaba Aap ek shakhs ke ghar

gaye aur khaana maanga. Us shakhs ne kaha “Baaba! Is waqt khaane ki koi cheez maujood nahi hai.” Aap ne ek bakse ki taraf ishaara kiya aur farmaaya “Tum jhut bol rahe ho. Us bakse me khaana rakha hua hai.” Haalaanki woh shakhs jaanta tha ke bakse me kuchh nahi hai magar Aap ki baat maankar us ne bakse ko khola to waaqai us me khaana maujood tha.

(7) Giriji naami ek aurat muhlik beemaari me mubtila thi. Kashinath Rao Patel ko apne khaadim se pata chala ke Giriji marne ke bilkul qareeb hai to us ne apne khaadim ko Baaba ki baargaah me bheja. Jab woh khaadim aaya to Aap chaay pee rahe the. Aap ne apne khaadim ko woh chaay ka piyaala diya aur us shakhs ke saath Giriji ke makaan par bheja.
Jab khaadim waha pahuncha to pata chala ke Giriji mar chuki hai. Us ne Giriji ke paas khade hokar kaha ke “Baaba ne tumhare liye chaay bheji hai. Uthkar pee lo.” Magar Giriji ke jism me koi harkat na hui. Khaadim ne dobaara kaha lekin phir bhi Giriji ke jism me koi harkat na hui. Aakhir me us ne us chaay ke piyaale ko Giriji ke munh ke paas rakha aur Giriji ke munh me chaay daalna shuru kiya t woh chaay peene lagi. Jab chaay khatm hui to woh bistar se khadi ho gai aur daudkar Baaba ki baargaah me aai.

(8) Ek martaba Tara naam ki ek dalit aurat Aap ke liye khaana lekar aai. Lekinn jab woh Baaba ki khidmat me aai to dekha ke kuchh ameer log Baaba ke liye khaana lekar aaye hain aur Laal Mahal me jaa rahe hain. Us ne woh khaana ek kapde mebaandhkar ek juamun ke darakht ke niche rakh diya aur waha se chali gai.
Ab un ameer logo ne Baaba ko khaana diya to Aap ne farmaaya ke “Main to dusra khaana khaaunga. Jaao, Jamun ke darakht ke neeche se khaana lekar aao.” Logo ne talaash kiya magar khaana na mila. Aakhir me Aap khade hue aur jaakar jamun ke darakht ke paas gaye aur khaana lekar aaye aur woh khaana khaaya.

(9) Husaam-ud-deen saahab bayaan karte hain
“Hazrat ki shohrat sun kar maine iraada kiya ke un ka mureed ho jaau. Usi raat maine khwaab me dekha ke baaba saahab ek hauz par wuzu kar rahe hain. Us paani ki ajeeb taaṡir hai ke us se badan ke aazaa aa’ine ki taraf saaf aur shaffaaf hote jaate hain. Wuzu karne ke baad Aap ne mujh se farmaya ke : Tum bhi wuzu kar lo. Maine bhi wuzu kiya aur mere aazaa bhi aa’ine ki tarah chamakne lage. Us ke baad Baaba saahab ne apna daaya haath meri taraf badhaaya. Maine dono haatho se Aap ka daste mubarak thaam liya. Aur phir meri aankh khul gai.
Subah ko daftar se chhutti li aur mureed hone ke khayaal se Nagpur pahuncha. Waha pahuncha to dekha ke Baaba taange par sawaar han aur logo ka ek hujum pichhe pichhe daud raha hai. Main bhi dauda aur sab se aage nikal gaya aur jaise hi taange ke qareeb pahuncha to Baaba ne mujhe dekh kar farmaaya ke : Kyun daudte ho janaab, Khwaab me haath milaaya hai woh kaafi hai.”

(10) Ek martaba ek Marwadi Sheth Delhi se Aap ki baargaah me aaya. Us ke pairo me itni kamzori thi ke woh chal nahi sakta tha. Jab woh khud ko ghasitta hua Baaba ki baargaah me pahuncha to Aap ne us ko apne pair se laat maari aur farmaaya “Tum chal sakte ho phir bhi bail ki tarah chalte hue yaha aaye ho?” Yeh sunkar us Sheth ko ta’ajjub hua. Baaba ne phir se kaha “Tum ne suna nahi ke maine kya kaha. Agar tum meri baat nahi maanoge to main tumhe laat maarunga.” Yeh sunkar woh Sheth foran khada hua aur daudkar baahar chala gaya. Yeh dekhkar waha maujood tamaam logo ko badi hairat hui.

 

 

Hazrat Syed Mohammad Baba Tajuddin Auliya
Hazrat Syed Mohammad Baba Tajuddin Auliya

 

Aap Hazrat Daawūd Chishti rahmatullāhi alaihi ke mureed aur khalifa hain.
Aap ko Hazrat Abdullāh Shaah Qaadri Nagpuri rahmatullāhi alaihi se bhi faiz mila hai.

 

Aap ke khulfa

(1) Hazrat Maulana Abdul Kareem Shaah urfe Yousuf Shaah Baaba rahmatullāhi alaihi (Karachi / Pakistan),
(2) Hazrat Qaadir Baaba rahmatullāhi alaihi (Vizianagram, Andhra Pradesh).

Moharram 1344 Hijri (August 1925 A.D.) me Aap beemaar hue Maharaja Raghoji Rao ne doctor se Aap ka ilaaj karaane ke liye kaha. Magar Aap ne inkaar kar diya.
Log Aap ki ziyarat ke liye aate rahe. Peer ke roz wisaal se pehle Aap ne apne haath uthaaye aur muskurakar logo ko dekha aur phir bistar par lait gaye.

 

Aap ka wisaal 26 Moharram 1344 Hijri (17 August 1925 A.D.) ko Peer ke roz hua.

Aap ka mazaar Tajbagh, Nagpur (Maharashtra) me hai.

ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Baaba Sayyed Taaj-ud-deen Mohammad rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

 

Hazrat Shaikh Ala-ud-deen Ali al-Muttaqi al-Hindi Biography

Hazrat Shaahe Meeran Sayyed Ali Qaadri al-Jilani Biography

Hazrat Meer Abdus Samad Khudanuma Qaadri Biography

Hazrat Shaikh Wasi Ahmad Muhaddith Naqshbandi Surat Biography

Hazrat Allama Maulana Muhammad Haamid Raza Khan Biography

Hazrat Khwaja Sayyed Abu Ahmad Abdaal Chishti Biography

Sultane Jahan Mehboobe Khuda Teri Shaano Shaukat Kya Kehna Lyrics

Sun Lo Khuda Kay Wastay Apnay Gada Ki Arz Lyrics

Sunega Kaun Meri Ilteja Rasoollah Lyrics

Sunehri Jalion Ko Ab Nazar Aane Ka Muqam Do Lyrics

 

Leave a Reply

This site uses Akismet to reduce spam. Learn how your comment data is processed.