Hazrat Rabia Basri al-Adawiya | Hazrat Rabia Basri Biography

 

Hazrat Rabia Basri al-Adawiya | Hazrat Rabia Basri Biography

wilaadat

Aap ki wilaadat 96 Hijri (715 A.D.) me Basra (Iraq) me hui.

Aap ke waalid ka naam Hazrat Ismā’eel rahmatullāhi alaihi hai.

Aap apne waalidain ki chothi beti thi, Is liye aap ka naam ‘Rabia’ rakha gaya.

Aap ke waalid itne ghareeb the ke aap ki paidaish ke waqt aap ko odhane ke liye kapda bhi nahi tha aur chirag jalaane ke liye tail bhi nahi tha. Aap ki walida ne apne shohar ko kaha ke “Aap padosi ke ghar se tel lekar aayen to hum chiraagh roshan kar saken.” Aap ke waalid ghar ke baahar nikle to darwaaze par unho ne socha ke “Maine kabhi apne Rab ke siwa kisi dusre ke saamne haath phailaya nahi hai.” Yeh sochkar woh wahi se khaali haath waapas laul aaye.

Us raat aap ke waalid ko khwaab me Huzoore akram Sarware kaa’inat Rasool-Allāh sallallāhu alaihi wa sallam ki ziyarat hui aur farmaaya ke “Tumhare yaha paida hone waali yeh bachi ALLĀH ki barguzida bandi hai aur uske zariye ALLĀH ta’ala bahut se logo ko hidaayat ata farmaega aur roze mehshar woh mere 70000 ummatiyo ki shafa’at karegi. Tum Basra ke Ameer Eisā-e -Zadan ke paas jaao aur mera yeh paighaam use dena ke : Tum har raat 100 martaba aur Jumeraat ko 400 martaba mujh par Durood shareef padhte ho. Is Jumeraat ko kisi wajah se tum yeh nahi kar paaye ho. Is liye kaffaare me tumhe is aane waale shakhs ko 400 deenaar ka hadiya dena hai.”

Jab Hazrate Ismā’eel jaage to aap ki aankh me khushi ke aansoo the. Subah ko woh Ameere Basra ke paas gaye aur Huzoor sallallāhu alaihi wa sallam ka khat use diya. Use dekhkar woh khush ho gaya ke “Mere Aaqa mujhe yaad karte hain’ aur us ne aap ko 400 deenaar diye aur saath me 1000 deenaar ghareebo me khairaat kiye.
Aur kaha ke “Jab bhi koi bhi zaroorat ho to foran mere paas aa jaana.’

 

Aap ke waalid ke inteqaal ke baad Basra me qehat pada. Aap jab ek qaafile ke saath jaa raha thi tab Dakaito ke giroh ne Aap ko pakad liya aur aap ko ghulaam banaakar bech diya. Aap ka maalik aap se bahot zyada kaam karaata tha.
Pura din bhari kaam karne ke baad bhi aap puri raat ibaadat e ilāhi me guzaarti thi.
Aur kai baar din ko roza bhi rakhti thi.

Ek baar der raat ko maalik jaaga to Rabia ibaadat me mashgool thi aur aap ke aas-paas noor chhaaya hua tha aur aap keh rahi thi ke “Aye mere Rab! Tu jaanta hai ke meri khwaahish hai ke main tere ahkaam par amal karti rahu aur dil se teri ibaadat karna chaahti hu. Aye meri aankho ke nor! Agar main aazaad hoti to pura din aur puri raat teri ibaadat me guzaarti. Magar main kya karu ke tum ne mujhe insaan ka ghulaam bana diya hai.’

Yeh sunkar maalik ko ehsaas hua ke Is ALLĀH ki waliya ko ghulaam banaakar rakhna ye be-adabi hai.
Subah ko us ne Hazrate Rabia ko bataaya ke “Main aap ko aazaad karta hu aur agar aap chaahe to aap ki khidmat karna chaahta hu. Agar aap chaahe to is ghar main reh sakti hain aur agar aap ki marzi yaha se jaane ki ho to aap jaa sakti hain.’

 

Aap ne farmaaya “Mera iraada yaha se nikalkar tanhaai me ALLĀH ta’ala ki ibaadat karne ka hai.”

 

Aap ghar ko chhodkar sehra (desert) me ibaadat wa riyaazat me lag gai.
Aap apne saath sirf ek maskija aur ek chattai rakhti thi aur aaraam karte waqt Aap sar ke neeche ek patthar ya eent rakha karti thi.

 

Ek martaba aap ke yaha chand mehmaan aaye. Aap ki khaadima ne bataaya ke “Ghar me ek roti ke siwa kuchh bhi nahi hai.” Aap ne farmaaya ke “Is roti ko le jaakar kisi miskeen ko de do.” Khaadima ne aisa hi kiya.
Chand lamho ke baad kisi ne aap ke darwaaze par dastak di. Puchha ke “Kaun hai?” to bataaya ke “Main falaan ka khaadim hu. Khaana lekar aaya hu.” Darwaaza kholkar dekha to 5 rotiya thi. Aap ne farmaaya “Ise waapas le jaao. Ye hamare liye nahi hai.”
Chand lamho ke baad kisi ne phir se darwwaze par dastak di. Puchha ke “Kaun hai?” to bataaya ke “Main falaan ka khaadim hu. Khaana lekar aaya hu.” Darwaaza kholkar dekha to ‘7 rotiya thi.’ Aap ne use bhi farmaaya “Ise waapas le jaao. Ye hamare liye nahi hai.”
Chand lamho ke baad kisi ne phir se darwwaze par dastak di. Puchha ke “Kaun hai?” to bataaya ke “Main falaan ka khaadim hu. Khaana lekar aaya hu.” Darwaaza kholkar dekha to 10 rotiya thi. Aap ne use le liya aur farmaaya “Ye hamare liye hai.”
Khaadima ne arz kiya “Pehle 2 baar aap ne khaana waapas kyun bhej diya?” Aap ne farmaaya “ALLĀH ne farmaaya hai ke 1 neki ka 10 badla ata farmaega. Hum ne 1 roti sadqa ki thi to hume 10 milni chaahiye. Is liye maine intazaar kiya.”

 

Aap Hazrat Hasan Basri rahmatullāhi alaihi ki mureed hain.

 

Aap Qalandar me shaamil hain.

Aap ne apne waqt ke kai mash’hoor ulama se mubaahisa kiya.

 

Jab koi aap se nikaah karna chaahta to Aap yeh kehkar inkaar kar deti ke “Main puri zindagi sirf ALLĀH ta’ala ki ibaadat me guzaarna chaahti hu.”

Khwaja Hasan Basri ne Aap ko nikaah ka paighaam bheja to Aap ne farmaaya “Agar koi shakhs mujhe yeh bata de mera naam-e-aamaal sidhe haath me diya jaayega ya ulte haath me, meri neki ka palda bhaari hoga ya nahi aur main pul siraat ko paar kar sakungi ya nahi to main us se nikaah karne ke liye tayyaar hu.”

Aap hamesha yeh dua karti thi ke “Aye ALLĀH! Agar main dozakh ke khauf se teri ibaadat karti hu to mujhe dozakh ki aag me jalaana,
Aur agar main jannat ki khwaahish se teri ibaadat karti hu to mujhe jannat se door kar dena,
Lekin agar main sirf teri raza ke liye ibaadat karti hu to mujhe tere husn o jamaal ka deedaar ata farmaana.”

Hazrat Rabia Basri al-Adawiya | Hazrat Rabia Basri Biography
Hazrat Rabia Basri al-Adawiya | Hazrat Rabia Basri Biography

 

Aqwaal

Aap irshaad farmaati hain :

  1. ALLĀH ta’ala se Mohabbat karni chaahiye kyun ki woh hamara Rab hai, us ke khauf ki wajah se nahi.

  2. Tauba ki taufiq ALLĀH ta’ala ka in’aam hai kyun ki ALLĀH ta’ala jise pasand karta hai us maqbool bande ko hi yeh taufiq ata farmaata hai.

  3. Koi shakhs kaamil nahi ban sakta jab tak ke woh deen ko apni nafsaani (zaati) khwaahishaat par tarjeeh na de.

  4. Achhe aur logo ki bhalai ke kaam me mashgool rehna yeh buzurgi ki nishaani hai.

  5. Mo’min ka dil us mombatti ki tarah hona chaahiye jo khud pighalkar bhi dusro ko roshni deti hai.

  6. Insaan ke dil me dunya ki mohaabat aur khuda ki mohabbat ek saath jama nahi ho sakti.

  7. Amal ke baghair Ilm aisa hai jaise Rooh ke baghair Jism.

Ek baar Hazrat Khwaja Hasan Basri rahmatullāhi alaihi ne Aap ko jheel (taalaab) ke kinaare dekha. Unho ne apna ja-namaaz paani par bichhaakar farmaaya ke “Rabia! Chalo yaha 2 rak’at namaaz padh lete hain.” Yeh sunkar Aap ne apna ja-namaaz hawa me rakha to woh thehar gaya. Phir Aap ne kaha ke “Chalo, yaha namaaz padh lete hain.”
Phir Aap ne farmaaya “Aap ne jo kiya woh ek machhli bhi kar sakti hai aur maine jo kiya woh ek makhi bhi kar sakti hai. Hum kyun apni karaamat dunya ko dikhaakar waqt barbaad karen, Asl me woh cheez zaahir karni chaahiye jo aap ke saathi nahi dikha sakte.”

 

Aap ke wisaal se pehle aap ne Abda bint Abi Showal se farmaaya tha ke “Mere inteqaal ki khabar logo me na phailaana aur mujhe mere puraane kurte se hi kafn dena.”

Aap ne wisaal ke waqt waha maujood tamaam mash’hoor mashaa’ikh se farmaya ke “Aap sab baahar chale jaayen aur farishto ko andar aane den.”
Sab ne aisa hi kiya aur makaan ka darwaaza band karke baahar intazaar karne lage.
Kuchh der baad sab ne ghaib se ek aawaaz suni “Aye Itminaan waali jaan (nafs e mutma’eenna), apne Rab ki taraf laut jaao, Tum us se raazi ho aur woh tum se raazi hai.”

 

wisaal

 

Aap ka wisaal 23 Rabi ul awwal 185 Hijri (11 April 801 A.D.) ko hua.

Aap ka mazaar Basra (Iraq) me hai.

 

ALLĀH ta’ala us ke Habeeb sallallāhu alaihi wa sallam ke sadqe me
Aur Hazrate Rabia Basri rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

 

Sweet Madina Sweet Madina Lyrics

Sultan e Karbala Ko Hamara Salam Ho Lyrics

Syed Ne Karbala Main Waday Nibha Diye Hain Lyrics

Hazrat Abu Muhammad Imam Hasan al-Mujtaba Biography

Hazrat Shaikh Allah-Bakhsh Abbaasi Naqshbandi Biography

Hazrat Khwaja Sayyed Ala-ud-deen Ali Ahmad Saabir Kaliyari Biography

Hazrat Allama Abdul Mustafa Azhari | Allama Abdul Mustafa Azhari Biography

Hazrat Maulana Shah Fazl-e-Rahman Gunjmuradabadi | Shah Fazle Rahman Biography muradabadi

Leave a Reply

This site uses Akismet to reduce spam. Learn how your comment data is processed.