Hazrat Makhdoom Shaikh Rukn-ud-deen Suharwardi Biography

 

 

Hazrat Makhdoom Shaikh Rukn-ud-deen Suharwardi rahmatullāhi alaihi :
———————–
Aap ki wilaadat Delhi me hui.

Aap Hazrat Khwaja Abdullāh Ansaari ki nasl se hain.

Aap ke waalid Hazrat Makhdoom Sadr-ud-deen Herat (Afghanistan) se Delhi tashreef laakar sukoonat pazeer hue.

************
Rabi-uṡ-ṡaani 801 Hijri (December 1398 A.D.) me jab Ameer Taimoor ne Delhi par hamla kiya to Aap Jaunpur tashreef laaye aur ta’aleeme deen karte rahe.
Aap ki ta’aleem wa faiz se hazaaro logo ko hidayat mili.

************
Aap Zaahid o Muttaqi the. Hamesha ibaadat o riyazat me masroof rehte the.

Aap ki sakhaawat ka yeh aalam tha ke Aap ne kai baar apne ghar ka saamaan ghareebo aur mohtaajo ko de diya.

Ek martaba chand durwesh Aap ki baargaah me haazir hue. Aap ne apne ghar me kuchh bhi saamaan na paaya to apna beta Shaikh Jalaal un durwesh ko de diya aur farmaaya ke “Ise bechkar apni zaroorat puri kar lo.” Jab Imaad-ul-mulk ke wazeer ko is baat ka pata chala to us ne foran Shaikh Jalaal ke badle me un durwesh ko 500 tanga diye.

Ek martaba Aap ko 1,00,000 tanga batore hadiya mile. Aap ne usi din saari raqam ghareebo me taqseem kar di aur apne liye kuchh bhi na rakha.

************
Karaamat :
‾‾‾‾‾‾‾‾‾‾‾‾
Ek martaba Faatima naami ek aurat apne 12 saal ke ladke Fateh Mohammad ko lekar Aap ki baargaah me aai. Woh ladka itna beemaar tha ke apni aankh bhi nahi khol raha tha. Us ne rote hue Aap se arz kiya. Aap ne ALLĀH ta’ala ka naam padhkar us ladke ke badan par dam kiya aur us ki sehat ke liye dua ki. ALLĀH ta’ala ke fazl se woh ladka foran tandurast hokar khada ho gaya.

************
Aap Hazrat Baaba Taaj-ud-deen Suharwardi rahmatullāhi alaihi ke mureed aur khalifa hain.

Aap ke khulfa :
(1) Hazrat Makhdoom Shaikh Mankan rahmatullāhi alaihi,
(2) Hazrat Shaikh Taaj rahmatullāhi alaihi.

************
Aap ka wisaal 13 Jamaadi-uṡ-Ṡaani 874 Hijri (18 December 1469 A.D.) ko hua.

Aap ka mazaar Taratala Mohalla, Jaunpur (Uttar Pradesh) me Gomti nadi ke kinaare par hai.

************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Makhdoom Shaikh Rukn-ud-deen Suharwardi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasoolﷺ ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

Leave a Reply

This site uses Akismet to reduce spam. Learn how your comment data is processed.