Hazrat Khwaja Fareed-ud-deen Mas’ood Ganje-shakar rahmatullāhi alaihi

Alqaab :
‾‾‾‾‾‾‾‾
Ganje-shakar (Treasure of Sugar), Qutb-e-akbar, Qutb-uz-Zaahideen.

**************
Aap ki wilaadat 29 Sha’abaan 569 Hijri (1179 A.D.) ko raat ko Khotwal, Multan (Pakistan) me hui.

**************
Aap ke waalid ka naam Hazrat Jamaal-ud-deen Sulaimān bin Shaikh Shuaib aur waalida ka naam Bibi Qursum Khaatoon urfe Bibi Maryam binte Maulana Wajeeh-ud-deen Khijwandi hai.

Aap Hazrat Umar Faarooq radi-Allāhu ta’ala anhu ki nasl se hain.

Aap ke pardaada Farrukh Shaah Kabuli Kabul aur Ghazna ke Sultaan the. Hulagu Khan ne jab hamla kiya to Farrukh Shaah Kabuli Mongol lashkar ke saath ladte hue Kabul me shaheed hue.
Is ke baad aap ke daada Shaikh Shuaib Kabul se Lahore aaye aur phir waha se Kasur aur phir Multan aaye aur aakhir me (1125 A.D.) me Khotwal me qayaam kiya.

Aap ke naana Hazrat Abbaas bin Abdul Muttallib radiy-Allāhu ta’ala anhu ki nasl se hain.

******************
Aap ki waalida jab haamila thi tab ek baar un ko padosi ke darakht par se phal khaane ki khwaahish hui to unho ne baghair apne padosi ki ijaazat ke darakht ke phal todne gai to un ke pait me shadeed dard hone laga jis se unho ne phal khaane ka iraada chhod diya.
Baaba Fareed ki wilaadat ke baad aap ke bachpan me aap ki waalida ne aap se kaha ke “Bete! Jab tum mere shikam me the tab maine kabhi haraam khaana nahi khaaya.” Yeh sunkar aap ne farmaaya “Magar Ammi jaan, ek baar jab aap ko padosi ke darakht par se phal khaane khaane ki khwaahish hui aur aap ne baghair us ki ijaazat ke darakht ke phal todne gai to aap ke pait me dard hone laga jis se aap ne phal khaane ka iraada chhod diya aur is tarah maine aap ko haraam khaane se bacha liya.” Yeh kehkar aap baahar khelne ke liye chale gaye aur aap ki waalida ta’ajjub ke saath khadi rahi.

****************
Bachpan me hi aap ke waalid ka inteqaal ho gaya. Is ke baad aap ki waalida ne Aap ki ta’aleem wa tarbiyat ki.

Ek baar aap ki waalida ne Aap ko namaaz padhne ke liye kaha. Aap ne puchha “Namaaz padhne se kya milega?” Aap ki waalida ne bete ko namaaz ki aadat daalne ke iraade se kaha “Bete! Tum namaaz padhoge to ALLĀH ta’ala tumhe shakkar ata farmaega.’ Aap namaaz padhne ke liye tayyaar hue to waalida ne aap ko wuzu karne ke liye farmaaya. Aap jab wuzu karne ke liye gaye to aap ki waalida ne musalle ke neeche ek kone me shakar rakh di. Jab Aap ne namaaz se faarig hokar shakkar maangi to waalida ne musaale ko uthaane ke liye kaha. Aap ne musalla uthaaya to neeche se shakar mili. Is tarah roz ye silsila jaari raha. Aap jabwuzu karne jaate tab aap ki waalida musalle ke neeche shakar rakh deti.
Ek baar Aap baahar khelne gaye the aur wahi se naher me wuzu karke aaye. Jab waalida ne wuzu ke liye kaha to aap ne kaha “Main baahar se wuzu karke aaya hu.” Aur Aap ne musalle par namaaz shuru kar di.
Aap ki waalida ne baargaah e ilāhi me dua ki “Aye Rabbul aalameen! Yaha tak laana mera kaam tha ab aage sambhalna tera kaam hai. Aye Qaadir e mutlaq, Aaj teri is bandi ki laaj rakh lena.”
Jab Aap namaaz padhkar apni waalida ke paas aaye to aap ki waalida ne puchha “Beta! Aaj shakar mili?” Aap ne kaha “Aaj tak to mujhe shakar ki pudiya milti thi, Magar aaj to ALLĀH ta’ala ke fazl se shakar ka ek bada hauz bhara hua tha.”
Yeh sunkar Aap ki waalida ne Rab ta’ala ka shukr ada kiya.

**********************
7 saal ki umr me Khotwal me ibtidaai ta’aleem mukammal hone ke baad aap ki waalida ne majeed ta’aleem ke Aap ko Multan bheja. Waha Aap ne Masjid me Maulana Minhaaj-ud-deen se Qur’an, Hadeeṡ, Fiq’h, Falsafa, Ilm e Istadalaal ki ta’aleem haasil ki aur Haafiz e Qur’an hue.

****************
Is duraan Hazrat Khwaja Qutb-ud-deen Bakhtiar Kaaki rahmatullāhi alaihi Delhi se Multan tashreef laaye. Hazrat namaaz ke masjid me aaye to Aap ki mulaaqaat hui aur Aap Hazrat Khwaja Qutb-ud-deen Bakhtiar Kaaki ke mureed hue.
Hazrat jab tak Multan me muqeem rahe Aap rozaana baargaah me haazir hokar faiz haasil karte. Jab Hazrat Delhi waapas rawaana hone lage to aap ne bhi un ke saath aane ki guzarish ki. Magar unho ne aap ko apni ta’aleem mukammal karne ka mashwara diya. Hazrat ki rawaangi ke baad Aap Peer ke farmaan par Ghazni, Kandahar, Baghdad, Sistan, Badakhshan, Jerusalem, Makka aur Madeena ka safar karte rahe.

593 Hijri se 611 Hijri tak 18 saal tak Aap Islaami mulko ka safar karke bahot saare buzurgaan e deen se faiz haasil kiya jis me Hazrat Shahaab-ud-deen Suhrawardi, Hazrat Imaam Hadaad aur Hazrat Shaikh Abdul Waahid Badakhshani rahmatullāhi alaihi shaamil hain.

****************
Jab Aap Hajj ke liye gaye tab Makka me qayaam ke baad Madeena shareef tashreef le gaye to Huzoor sallallāhu alaihi wa sallam ne aap ko bashaarat dekar Baghdad jaane ke liye farmaaya. Aap Baghdad tashreef le gaye aur waha Hazrat Ghauṡe aazam Shaikh Sayyed Abdul Qaadir Jilani radiy-Allāhu ta’ala anhu ke saahabzaade Hazrat Hazrat Shaikh Sayyed Abdul Wahaab Jilani rahmatullāhi alaihi se mulaaqaat hui to unho ne Aap ko tabarrukaat ka ek sandooq ata farmaaya jis me 2 alam jo Huzoor Rasool-Allāh sallallāhu alaihi wa sallam ne jung me istemaal kiye the, ek amaama aur ek jod qainchi the.
Aur Hazrat Sayyed Abdul Wahaab Jilani rahmatullāhi alaihi ne Aap ko Qaadri silsile ki khilaafat bhi ata farmai.

Is ke baad Aap ne Masjid e Aqsa me qayaam karke waha safaai ka kaam bhi kiya.

******************
Phir Hindustan ki taraf rawaana hue. Raaste me Multan me Hazrat Khwaja Baha-ud-deen Zakariya Suhrawardi rahmatullāhi alaihi se mulaaqaat hui to unho ne puchha ke “Aap wilaayat aur sulook me kis maqaam tak pahunche hain?” Aap ne jawaab diya “Agar main kahu to aap jis kursi par baithe hain woh hawa me udne lage.” Aap ne abhi yeh farmaaya hi tha ke Khwaja Baha-ud-deen Zakariya ki kursi hawa me udne lagi.

*******************
Is ke baad Aap Khotwal aaye aur apni waalida ki khidmat ke liye thehre.

Phir Delhi aakar apne Peer Khwaja Qutb-ud-deen Bakhtiar Kaaki ki khidmat me haazir hue.
Khwaja Qutb-ud-deen Bakhtiar Kaaki ne Hazrat Qaazi Hameed-ud-deen Nagori, Maulana Ala-ud-deen Kirmani, Sayyed Noor-ud-deen Mubarak, Shaikh Nizaam-ud-deen Moeed, Maulana Shams-ud-deen Turk, Shaikh Mahmood, Khwaja Burhaan-ud-deen Balkhi, Maulana Zia-ud-deen Rumi rahmatullāhi alaihi aur dusre buzurgo ki maujoodgi me Aap ke sar par Kulah-e-chahaar Tarki rakhi.
Aur farmaaya “Bete Fareed! Murshid ALLĀH ta’ala ke itne qareeb hona chaahiye ke woh apni roohaani taaqat se apni nigaah e faiz se apne mureed ke dil ke mail ko saaf karne ki salaahiyat rakhta ho aur apne mureed ko ALLĀH ta’ala se milaana jaanta ho. Agar Murshid me yeh qaabiliyat na ho to woh aur us ka mureed Sulook me apni manzil e maqsood tak pahunch nahi sakte.”

Phir Aap ne Delhi me apne Peer ki sohbat me ta’aleem haasil ki.

*********************
Hazrat Khwaja Qutb-ud-deen Bakhtiar Kaaki rahmatullāhi alaihi ne Aap ko Chilla-e-Makoos karne ke liye kaha.
Aap ne apne Peer ke farmaan par Ghazni darwaaza ke qareeb Masjid e Hajj me Chilla kiya. Is masjid ke muazzin Rasheed-ud-deen Meenayi Hansvi roz namaaz e Isha’ ke baad aap ke pairo me rassi baandhkar aap ko ek kuen me is tarah andar utarte ke aap ka sar neeche kuen me rehta aur pair upar rehte. Aur aap puri raat zikr e ilāhi aur mujaahida me guzaarte. Aur fajr ki azaan se pehle aap ko baahar nikalte. Aur is baat ki kisi ko khabar na hone dete. 40 din tak yeh karne ke baad Aap ne apne Peer ko yeh kaam mukammal hone ki baat batai to woh bahot khush hue.

***********************
Ek martaba Hazrat Khwaja Moeen-ud-deen Hasan Chishti rahmatullāhi alaihi Ajmer se Delhi tashreef laaye to Khwaja Qutb-ud-deen Bakhtiar Kaaki ke saath aap se mulaaqaat ke liye aaye. Aap ne jab do murshid ko ek saath apne hujra par dekha to aap foran ba-adab khade hokar un ka istaqbaal karne ke liye khade hue. Magar bahot zyada kamzori ki wajah se aap aage nahi aa sake lekin dono buzurgo ne aap ko foran thaam liya.
Khwaja Ghareeb nawaaz ne farmaaya :
“Baaba Qutub, shaahbaaz e azeem dar daam awurdayee ke hajuz Sidratul muntaha aashian nagirad,
Shama aist ke zaanawada e dervishaan munawwar saazad.
[Aye Baada Qutub, Tum ne ek aise azeem shaahbaaz ko paaya hai jis ka aashiyaana Sidratul muntaha se door nahi hai,
Yeh aisi shama hai jis se jis ki roshni se silsile ke durwesh munawwar hote rahenge.]”

Aur Khwaja Ghareeb nawaaz ne aap ko ‘Khil’at’ (dress of honour) ata farmaaya aur Khwaja Qutb-ud-deen Bakhtiar Kaaki ne aap ko Khirqa e khilaafat ata farmaaya.

Khwaja Ghareeb nawaaz ne aap ke liye dua farmaai to ghaib se nida aai “Fareed raa bargazidaim [Hum ne Fareed ko maqbool farmaaya].”

******************
Is ke baad aap Hansi tashreef le gaye.
633 Hijri (November 1235 A.D.) me aap ne khwaab me dekha ke Khwaja Qutb-ud-deen Bakhtiar Kaaki ka wisaal ho gaya hai. Aap foran Delhi ke liye rawaana hue. Delhi pahunchkar pata chala ke 14 Rabi’-ul-awwal ko Khwaja Qutb-ud-deen Bakhtiar Kaaki ka wisaal ho chuka hai. Hazrat Qaazi Hameed-ud-deen Naagori ne Khwaja Qutb-ud-deen Bakhtiar Kaaki ki wasiyat ke mutaabiq mash’hoor durwesho ki majlis me aap ko Peer ke tabarrukaat ata kiya.

Is ke 4 mahine baad Khwaja Moeen-ud-deen Hasan Chishti ka wisaal hua.

Delhi ke Sultaan Shams-ud-deen al-Tamish ke inteqaal ke baad un ki beti Razia Sultaana ne baghaawat aur saazisho ki wajah se bahot mushkilo ka saamna kiya aur aakhir me jung me use qatl kar diya gaya.

*********************
Is ke baad Aap ne Ajmer jaakar Hazrat Khwaja Ghareeb nawaaz ke mazaar ke qareeb ek tehkhaane me Chilla kashi ki.
Is dauraan ek martaba Aap ne khwaab me Huzoore Akram sallallāhu alaihi wa sallam ki ziyaarat ki. Jab bedaar hue to mehsoos kiya ke khwaab me jis jagah se Huzoor sallallāhu alaihi wa sallam ko guzre the wo jagah qaaqai khushboo se muattar thi. Lihaaza us maqaam ka naam ‘Jannati Darwaaza’ rakh diya gaya.
Is ke baad Aap Ajodhan tashreef le gaye. Chand roz baad Aap ko ghaib se Ajodhan me hi rehkar logo ko faiz pahunchaane ke farmaan hua to Aap ne Ajodhan me hi sukoonat ikhtiyaar karne ka faisla kiya.

Aap ki khaanqaah me durwesh aur taalibaan aur tamaam log faiz haasil karne ke liye aane lage.

*********************
Kuchh arse baad Aap ne apne bhai Hazrat Najib-ud-deen Mutawakkil ko waalida ke paas Khotwal bheje. Aap ke bhai Khotwal se Ajodhan ke rawaana hue tab waalida ko ghode par bithaaye aur khud paidal chalte the. Raaste me ek jangal se guzre to waalida ko pyaas lagi. Aap ke bhai ek darakht ke neeche waalida ko bithaakar paani talaash karne ke liye gaye. Jab woh waapas aaye to waalida waha maujood nahi thi. Talaash karne ke baad jab waalida ka kuchh pata na chala to woh Ajodhan gaye aur tamaam qissa bataaya. Khwaja Fareed-ud-deen ne kuchh logo ko us maqaam par bheje. Unho ne bahot talaash kiya magar kuchh paata na chala. Baaba Fareed ne baargaah e ilāhi me arz kiya to apni waalida ke liye isaal e ṡawaab karne ka farmaan hua.

*****************
Aap ne hamesha saadgi aur Sabr o Qana’at pasand farmaaya.
Aap hamesha zameen par sote.
Agar kuchh na ho to baghair khaaye waqt guzaar lete magar kisi se koi cheez maangte nahi. Aap farmaate ke “Agar koi shakhs qarz ada kiye baghair mar gaya to use qayaamat me qarz dene waale ke saamne sharminda hona padega. Qarz aur Qana’at me itna bada farq hai ke jitna poorab aur pachchim ke darmiyaan hai. Durwesh ke liye qarz lene se zyada behtar hai ke woh mar jaaye.”

Aap ki baargaah me jo bhi cheez aati thi aap use foran ghareebo aur mohtaajo me taqseem kar dete. Aap farmaate ke “Jo kal ke liye bachaane ka sochta hai wo Rab ta’ala ki rahmat se mehroom rehta hai.”

Khaanqaah ke langar me roz kaṡeer ta’adaad me logo ko khaana khilaaya jaata tha. Kai baar agar log zyada ho aur khaana kam pade to aap khud ka khaana bhi khila dete aur khud bhuke rehte.

Aap farmaate ke “Hum apne hisse se ya’ani Ilm se raazi hain aur jaahil apne hisse ya’ani maal o daulat se.”

************************
Ek baar Delhi ke Sultaan Ghyaas-ud-deen Balban ne Hazrat ki baargaah me deenaar se bhare hue 2 tabaak bheje. Aap ne Maulana Badr-ud-deen Is’hāq se puchha ke “Hume langar ke liye aaj kitni raqam ki zaroorat hai?” Unho ne kaha “Hume Langar ke liye 1 taanka aur dusre kharch ke liye 1 taanka ki zaroorat hai.” Aap ne farmaaya “Utni raqam rakhkar baaqi sab ghareebo me taqseem kar do.”
Shaam ke waqt Maulana Badr-ud-deen Is’hāq ne chiraagh jalaaya to unho ne dekha ke ek taanka anjaane me zameen par gir gaya tha. Unho ne yeh socha ke “Yeh kal ke liye kaam aayega” aur us taanka ko uthakar kapde me lapet liya.
Raat ko Hazrat ne Ishaa ki namaaz padhaana shuru kiya to Soorah al-Faatiha ke baad Qir’at karte hue achaanak neeche baith gaye. Aap ne phir se namaaz padhaana shuru kiya to Soorah al-Faatiha ke baad chand aayat padhkar phir se rook gaye aur Maulana Badr-ud-deen Is’hāq se puchha “Kya baat hai ke mujhe aaj namaaz me lutf nahi aa raha hai? Sultaan ne subah jo maal bheja tha us me se kuchh baaqi to nahi reh gaya hai na?” Maulana Badr-ud-deen Is’hāq Aap ke pichhe khade the. Unho ne kaha “Huzoor! Aap ke farmaan ke mutaabiq maine sab maal ghareebo me taqseem kar diya tha.Magar shaam ko chiraagh karne ke baad maine dekha to pata chala ke ek taanka anjaane me zameen par gir gaya tha. Woh maine apne paas rakh liya ke kal ke kharch ke liye kaam aayega.” Aap ne farmaaya “Durwesh kabhi kal ki fikr nahi karte. Us taanka ko abhi door kar do. Woh meri namaaz me khalel kar raha hai aur mujhe namaaz me lutf nahi aa raha hai.” Yeh sunkar Maulana Badr-ud-deen Is’hāq ne foran us taanka ko kapde me se nikaala aur door phenk diya.
Is ke baad Aap ne phir se khuzu aur lutf ke saath namaaz padhaai.

***************
Karaamat :
‾‾‾‾‾‾‾‾‾‾‾‾‾
(1) Ek martaba ek saudaagar oonto par shakkar laadkar Multan se Delhi jaa raha tha. Raste me Pak Pattan se guzra to Hazrat Khwaja Fareed ne puchha ke “Oonto par kaya hai?” Saudaagar ne mazzaaq me kaha “Namak hai.” Yeh sunkar Hazrat ne kaha “Theek hai. Namak hi hoga.’ Jab manzil par pahunchkar saudaagar ne dekha to us me namak nikla. Woh waapas aaya aur Hazrat ke qadmo me girkar muafi maangi. Aap ne farmaaya “Agar shakkar thi to shakkar hi hogi.” Chunaanche woh namak phir se shakkar ban gaya.

(2) Ek baar Hasan naami ek qawwaal Aap ki baargaah me aaya aur apni beti ki shaadi ke liye kuchh madad karne ke liye arz kiya. Khwaja ne farmaaya “Hasan! Main to ek durwesh hu. Durwesh ke paas dunya ka maal nahi hota.” Magar Hasan ne kuchh ata karne ke liye israar kiya. Aap ki qareeb ek eent padi thi. Aap ne Hasan ko use uthaane ke liye kaha. Hasan ne jaise hi us eent ko uthaaya to woh eent sone me tabdeel ho gai. Hasan khush hokar Aap ka shukr maante hue aur dua dete hue waha se rawaana hua.

(3) Ek baar ek aurat Aap ki baargaah me aai aur kaha “Huzoor! Mera beta 20 saal se kho gaya hai aur main yeh bhi nahi jaanti ke woh zinda hai ya nahi. Magar us ki judaai me meri zindagi badtar ho gai hai.” Yeh sunkar Aap muraaqaba me chale gaye. Kuchh der baad Aap ne us aurat se farmaaya “Jaao, tumhara beta tumhare ghar par pahunch gaya hai.” Woh aurat jaldi se apne ghar ki taraf rawaana hui. Raaste me hi use apna beta mil gaya aur dono ghar par gaye. Us aurat ne apne bete se us ke haalaat ke baare me puchha to us ladke ne bataaya ke “Main yaha se 1500 mile door pahunch gaya tha. Aaj mere dil me tum se milne ki khwaahish hui albatta mujhe waha se nikalne ki koi ummeed nahi thi. Main ek nadi ke kinaare khada tha ke achaanak ek mohtaram shakhs waha aaye aur mujhe apni pareshaani ki wajah puchhi. Maine un ko saari baat bataai to unho ne kaha : Maan lo ke tum apne ghar pahunch gaye ho. Mujhe un ki baat par yaqeen na hua. Unho ne mujhe apni aankhen band karke mera haath un ke haath me dene ke liye kaha. Maine waisa hi kiya. Kuchh der baad jab maine aankhen kholi to maine khud ko yaha paaya.

(4) Ek martaba Aap Hazrat Khwaja Baha-ud-deen Zakariya Multani rahmatullāhi alaihi aur dusre asfiya ke saath Baghdad ki taraf safar kar rahe the. Raaste me Khwaja Baha-ud-deen Zakariya ke paanv me ek saanp ne kaata. Jis ke sabab un ko shadeed dard hone laga aur wo behosh hone lage. Un ke ilaaj ke liye waqt nahi tha. Aap ne foran zameen par se mitti uthaai aur ‘Bismillāhir Rahmānir Raheem’ padhkar un ke paanv par laga di. ALLĀH ke fazl se Khwaja Baha-ud-deen Zakariya ko saanp ke zeher se koi nuqsaan na hua aur wo bilkul theek ho gaye.

(5) Ek baar Aap Hazrat Khwaja Baha-ud-deen Zakariya ke makaan par muqeem hue. Khwaja Baha-ud-deen Zakariya ki ek khaadima thi jis ki paishaani par ek baras ka ek daagh tha jis se us ki khubsurti kam ho jaati thi. Us ki iltija par Khwaja Baha-ud-deen Zakariya ne us ke liye baargaah e ilāhi me kai baar dua ki thi magar har baar yehi farmaan hota tha ke “Intazaar karo.”
Khwaja Baha-ud-deen Zakariya ne use Baaba Fareed ki khidmat ke liye rakha. Woh Aap ke liye wuzu ka intazaam karti thi. Ek baar Aap ki nazar us daagh par padi. Aap ko raham aaya aur Aap ne us ke liye dua ki aur foran woh daagh gaa’ib ho gaya.
Khwaja Baha-ud-deen Zakariya ne Aap ki karaamat dekhkar khush hokar farmaaya “ Baaba Fareed ki dua kaise rad ki jaati? Rabb e Kareem aap ki har dua qubool karne ke liye raazi hai.”

(6) Ek martaba Mohammad Shaah naami Hazrat ka ek mureed Aap ki baargaah me haazir hua. Aap ne us se us ki pareshaani ki wajah puchhi. Us ne bataaya ke “Mera bhai ko koi muhlik beemaari hui hai aur woh sakraat me hai. Main Aap ke paas us ke liye dua karwaane ke liye aaya hu.” Aap ne farmaaya “Tumhara bhai bilkul tandurast hai. Tum khaamakha pareshaan ho rahe ho.” Woh bhaagkar apne ghar gaya to use ye dekhkar ta’ajjub hua ke us ka bhai baithkar baaten kar raha tha aur khaana khaa raha tha jaise ke beemaar tha hi nahi.

(7) Ek shakhs ko koi beemaari thi jo theek nahi ho rahi thi. Hazrat Khwaja Nizaam-ud-deen Auliya ne ek shakhs ko Aap ki baargaah me dua ke liye bheja. Hazrat ne ek kaagaz ka tukda liya aur us par ‘ALLĀH Kaafi ALLĀH Shaafi’ likhkar use diya aur farmaaya “Is kaagaz ko apne gale me pahen lo.” Jaise hi us shakhs ne us kaagaz ko apne gale me rakha foarn ALLĀH ke fazl se woh bilkul theek ho gaya.

(8) Ek martaba Arab ke kuchh shakhs Hazrat ki baargaah me aaye aur arz kiya “Huzoor! Hum bahot ghareeb hain aur is mulk me anjaan hai. Hamare paas jo bhi maal tha woh safar me khatm ho gaya hai aur ab waapas jaane ke liye kuchh nahi hai.” Aap ne apne paas padi hui chand sukhi khajooren uthaakar un logo ko de di aur farmaaya “Inhe rakh lo. Jaao, ALLĀH ta’ala ke fazl tumhaara safar aasaan hoga.” Wo log maayoos ho gaye kyun ki wo kuchh maal milne ki ummeed lekar Hazrat ke paas aaye the. Khaanqaah ke baahar aakar unho ne un khajooro ko phenk dena chaaha. Magar unhe ye dekhkar ta’ajjub hua ke wo khajooren sone me tabdeel ho gai th. Wo log khush hokar Khwaja ka shukr maante hue aur dua dete hue waha se rawaana ho gaye.

(9) Shams Dabeer naami ek shaayar Hazrat ke shaagird the. Ek baar unho ne ek Qaseeda padha. Us qaseeda me Hamd e baari ta’ala ke sher sunkar Hazrat bahot khush hue aur us se farmaaya “Agar tumhari koi khwaahish ho to mujhe bataao.” Shams Dabeer ne dekha ke Hazrat bahot khush hai. Unho ne arz kiya “Huzoor! Meri waalida nahot budhi ho gai hai aur unhe meri madad ki zaroorat hai. Magar main ghareeb hu aur apni zimmedaari ada nahi kar sakta hu.” Hazrat ne farmaaya “Theek hai. Kuchh shukraana lekar aao.” Shams Dabeer apne ghar gaye aur 50 jeetal lekar waapas aaye aur Hazrat ko diye. Aap ne wo sab waha maujood logo me baant diye. Phir Shams Dabeer ki khushhaali ke liye dua ki.
Kuch arse baad Shams Dabeer ko Delhi me Sultaan Naasir-ud-deen Mahmood ke darbaar me achha ohada mila aur tarakki karte karte aap Shaahi khazaanchi ban gaye. Sultaan Balban ke zamaane me bhi woh shaahi khazaanchi rahe. Is tarah Hazrat ki dua se un ki ghareebi door ho gai.

(10) Ek martaba Lahore ke governor ne Aap ke mureed Shaikh Aarif Sewastani ko 100 deenaar diye aur Ajodhan jaakar ye nazraana Hazrat ko pahunchane ke liye kaha. Sheikh Arif Sewastani jab Ajodhan pahunche to unho ne Hazrat ko 50 deenaar diye. Aap muskuraaye aur farmaaya “Tum ne aadha nazraana hi diya hai.” Yeh sunkar Shaikh Arif Sistani ko ta’ajjub hua aur woh pareshaan ho gaye. Aur foran baaqi 50 deenaar bhi aap ke paas rakh diya. Aap ne farmaaya “Durwesh ko hamesha amaanatdaar rehna chaahiye warna woh kabhi kaamil nahi ho sakta.”
Yeh kehkar Aap ne wo 100 deenaar unhe de diya. Aur phir se un ko apna mureed banaaya aur Lahore waapas bheja.

(11) Multan me qayaam ke dauraan waha ka Qaazi jo waha ki masjid ka Imaam tha, us ne Khwaja ki shohrat dekhkar hasad ki wajah se Aap ko pareshaan karna shuru kiya.
Ek baar us ne ek shakhs ko maal dekar use Khwaja ko qatl karne ke liye bheja. Wo shakhs chhoori lekar durwesh ke libaas me khaanqaah par aaya. Us waqt aap haalat e sajda me the. Aap ne usi haalat me farmaaya “Koi haazir hai?” Aap ke mureed e khaas Khwaja Nizaam-ud-deen Auliya ne jawaab diya “Huzoor! Aap ka yeh ghulaam haazir hai.” Aap ne farmaaya “Baahar durwesh ka safed libaas pahena hua koi shakhs hai?” Khwaja Nizaam-ud-deen Auliya ne dekhkar bataaya “Ji Huzoor.” Aap ne farmaaya “Woh shakhs chhoori lekar mere qatl ke iraade se aaya hai. Use kaho ke waapas chala jaaye aur apni aakhirat kharaab na kare.” Jab ye guftagu ho rahi thi tab wo shakhs thoda aage aa chukka tha. Us ne ye sab suna to foran waha se bhaag gaya aur us qaazi ko keh diya ke “Main yeh kaam nahi kar sakta.”

Is ke baas us qaazi ne Patwaari ko Khwaja aur aap ke beto ko zameen ke muamalaat me pareshaan karne ke liye kaha. Khwaja ne apna asaa Mubarak ko zameen par zor se rakha to foran us patwaari ko pait me shadeed dard shuru ho gaya. Patwaari ne logo ko khwaja ke paas le jaane ke liye kaha. Magar raaste me hi us ki maut ho gai.

Is haadse ke baad qaazi ne Aap ko pareshaan karna band kar diya.

(12) Ek martaba Aap ek darakht ke neeche mujaahida me mashgool the. Us darakht par kuchh chidiya baithi thi. Un ki aawaaz se Aap ko mujaahida me khalel hui to aap ne farmaaya “Aye chidiyan! Mujhe khalel mat pahunchaao. Yaha se chali jaao.” Jaise hi Aap ne yeh farmaaya ke foran wo chidiyan markar aap ke qadmo me giri. Yeh dekhkar aap ko bahot dukh hua aur Aap ne ALLĀH ta’ala se dua ki to ALLĀH ke fazl se wo chidiyan dobaara zinda ho gai.

(13) Ek martaba Aap ke sar ka baal tootkar neeche gir gaya. Hazrat Nizaam-ud-deen Auliya ne Aap se ijaazat lekar woh baal le liya aur use hifaazat ke saath ek taaweez banakar rakh liya. Jab Hazrat Nizaam-ud-deen Auliya Delhi aaye to jab kisi mareez ke liye zaroorat hoti to woh taaweez use dete aaur ALLĀH ke fazl se us baal mubarak ki barkat se woh mareez theek ho jaata. Jab us taaweez ki shohrat shaher me phail gai to unho ne us taaweez ko zameen me ek gad’ha banakar rakh diya.
Ek martab un ke ek dost Taaj-ud-deen Miani Hazrat Nizaam-ud-deen Auliya ke paas aaye aur apne beemaar bete ke liye us taaweez ko dene ke liye arz kiya. Hazrat taaweez nikaalne ke liye us jagah par gaye. Magar unho ne dekha ke gad’he me wo taaweez nahi hai. Aap ne bahot talaash kiya magar woh taaweez nahi mila. Taaj-ud-deen Miani maayoos hokar chale gaye aur un ka beta intiqqal kar gaya. 2 din baad ek aur shakhs Hazrat ke paas us taaweez ke liye aaya. Unho phir us jagah par jaakar dekha to woh taaweez waha maujood tha aur us ki barkat se woh mareez theek ho gaya.
Taaj-ud-deen Miani ke bete ki zindagi puri ho chuki thi is liye ALLĀH ta’ala ke hukm se woh taaweez ghaa’ib ho gaya tha.

*********************
Aqwaal :
‾‾‾‾‾‾‾‾
Aap irshaad farmaate hain ke
(1) Sirf Tadbeer par bharosa rakhna aafat (museebat) ka sabab hai, aur ALLĀH ta’ala par Tawakkal rakhna aafiyat (amn) ka sabab hai.

(2) Faqr apnaane waala aalim dusre ulama par aisi fazeelat rakhta hai jaise Chaand tamaam sitaaro par.

(3) Soofi woh hai jo har cheez waazeh kar de aur kisi bhi baat par makhtal (disturbed) na ho.

********************
Pariwaar :
‾‾‾‾‾‾‾‾‾‾‾‾
Aap ka pehla nikaah 621 Hijri me Bibi Najib-un-nisa binte Mohammad Azeem Shaah Siddeeqi al-Quraishi se hua.

4 Saahabzaade :
(1) Mohammad Naeem-ud-deen
(2) Mohammad Sultaan-ud-deen
(3) Mohammad Fareed Baksh
(4) Mohammad Azeez-ud-deen.

3 Saahabzaade :
(1) Sharf-un-nisa Khadeeja (Jin ka nikaah Hazrat Khwaja Ala-ud-deen Saabir Kaliyari se hua aur pehli raat ko intiqaal hua.)
(2) Asghari
(3) Basari
(Dono ka intiqaal bachpan me hi Hansi me hua.)

Dusra nikaah 15 Rajab 634 Hijri ko Bibi Hazeera Khaatoon binte Sultaan Naseer-ud-deen Mahmood se hua.

5 saahabzaade :
(1) Hazrat Shahaab-ud-deen Ganj-e-Ilam
(2) Hazrat Nizaam-ud-deen Shaheed
(3) Hazrat Shaikh Badr-ud-deen Sulaimān (Sajjaadanasheen)
(4) Hazrat Mohammad Ya’aqoob (Jo Amroha Abdaalo ki sohbat me chale gaye)
(5) Hazrat Shaikh Abdullāh Bayaabaani

5 saahabzaadiya :
(1) Bibi Faatima (Jin ka nikaah Hazrat Maulana Badr-ud-deen Is’hāq se hua)
(2) Bibi Shareefa
(3) Bibi Mastura (Jin ka nikaah Hazrat Shaikh Umar Soofi se hua)
(4) Bibi Haajra
(5) Bibi Zainab

Teesra nikaah 639 Hijri me Bibi Umme Kulṡoom binte Sayyed Nisaar Ali se hua (jo Sayyed Inaam-ul-Haq ki bewa thi).
In ke sab farzand ka bachpan me hi intiqaal ho gaya.

*******************
Aap Hazrat Khwaja Qutb-ud-deen Bakhtiar Kaaki Chishti rahmatullāhi alaihi ke mureed aur khalifa hain.

Aap ke khulfa :
(1) Hazrat Khwaja Sayyed Nizaam-ud-deen Auliya rahmatullāhi alaihi
(2) Hazrat Khwaja Sayyed Ala-ud-deen Ali Ahmad Saabir Kaliyari rahmatullahi alaihi
(3) Hazrat Khwaja Shaikh Jamaal-ud-deen Hansawi rahmatullahi alaihi
(4) Hazrat Shaikh Burhaan-ud-deen Soofi rahmatullāhi alaihi
(5) Hazrat Khwaja Sayyed Ala-ud-deen Kalpawi rahmatullahi alaihi
(6) Hazrat Maulana Badr-ud-deen Is’hāq rahmatullahi alaihi
(7) (Aap ke bhai) Hazrat Najeeb-ud-deen Mutawakkil rahmatullāhi alaihi
(8) Hazrat Shaikh Aarif rahmatullahi alaihi
(9) Hazrat Maulana Fakhr-ud-deen Isfahani rahmatullāhi alaihi.

************************
Aap ke wisaal ke chand roz pehle Aap ke mureed Shams Dabeer ne Aap ki baargaah me Nizaami ki mash’hoor ‘Maṡnawi’ ko faarsi me padha. Jise sunkar Aap aalam e wajd me aa gaye. Jab Aap hosh me aaye to aap ne apna jhubba mubarak Shams Dabeer ko ata farmaaya.

Us ke baad chand roz tak Aap bilkul khaamosh rehne lage. Sirf namaaz padhte aur tilaawat e Qur’ān karte.

Jab tabeebo ko Aap ke ilaaj ke liye bulaaya gaya to aap ne ilaaj karaane se mana kiya aur ek sher sunaaya :
“Az sar e baaleen e mun barkhez aye naadaan tabeeb,
Dardmand e Ishq raa daru bajuz deedaar naist.”

5 Moharram 661 Hijri ko Aap ke haalaat aur kharaab hue. Aap namaaz e Ishaa ke baad behosh ho gaye aur jab phir se hosh me aaye to aap ne puchha “Kya maine namaaz e Ishaa ada kar li?” Logo ne kaha “Ji haan.” Aap ne farmaaya “Mujhe dobaara ada karne do kya pata mujhe phir se namaaz padhne na mile.” Aap ne wuzu kiya aur namaaz e Ishaa padhi. Namaaz ke baad Aap phir se behosh ho gaye. Jab hosh aaya to Aap ne phir se wuzu kiya aur namaaz e Ishaa padhi. Aur haalat e sajda me Aap ne ‘Yaa Hayyu Yaa Qayyoom’ padha aur Aap ka intiqaal ho gaya. Aur ghaib se ek nida aai ‘Dost ba dost pewast’.

Aap ke wisaal ki khabar pure Ajodhan me phail gai aur hazaaro ki ta’adaad me log aap ki khaanqaah par haazir ho gaye. Ek budhi aurat ek kapda lekar aai aur kaha “Maine is kapde ka har dhaaga ba-wuzu buna hai aur apne kafan ke liye ye kapda tayyar kiya hai. Magar main chaahti hu ke is kapde ko Hazrat ke kafan ke liye istemaal kiya jaaye. Mujhe yaqeen hai ke agar ise qubool kar loge to mere Rab mere gunaaho ko bakhsh dega aur meri maghfirat farma dega.” Hazrat ke saahabzaado ne us aurat ki aqeedat o mohabbat dekhkar us kapde ko le liya aur us ki khwaahish ke mutaabiq use Hazrat ke kafan me istemaal kiya.

*****************
Aap ka wisaal 5 Moharram 661 Hijri (November 1262 A.D.) ko me Ajodhan (Pakpattan) me hua.

Aap ka mazaar Pakpattan (Pakistan) me hai.

*****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Fareed-ud-deen Mas’ood Ganje-shakar rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

Leave a Reply

This site uses Akismet to reduce spam. Learn how your comment data is processed.